"மங்கையராய் பிறப்பதற்கே
நல் மாதவம் செய்திடல் வேண்டுமம்மா"
- கவிமணி 'தேசிக விநாயகம் பிள்ளை'.
மாதரைக் கேட்டால் என்ன சொல்லுவார்கள். 'மா... தவம்' தான் என ஒப்புக் கொள்வார்களா?
அல்லது 'மா...மோசம்' என கழுவிக்கழுவி ஊற்றுவார்களா?
கேள்விகள் எழுகின்றன. வீட்டில் 'வூட்டம்மாவிடம்' கேட்கலாமா?
வேறு வம்பே வேண்டாம்.
தேநீருக்குப் பதிலாக...
இன்று...
"ஆரஞ்சு மிட்டாய்கள்"
முன்னெல்லாம்' தேசியக் கொடி' ஏற்றியவுடன் 'ஆரஞ்சு மிட்டாய்' தருவார்கள்.
இன்று மகளிர் சுதந்திர
வெளியின் நாள். அதனால்
'ஆரஞ்சு மிட்டாய்'.
"இரு சிறகு" ...
"படி தாண்டி
நிமிர்ந்தால் வானம்...
கைகள் இரண்டும் விரித்தால்
சிறகு!
பரந்த வெளி உனது...
பார்க்கும் விழி எனது...
' பற'... "
' மகளிர்' தின நல் வாழ்த்துக்கள்
"துன்பம் என்றும் ஆணுக்கல்ல.
அது அன்றும் இன்றும் பெண்களுக்கே...
.......... ........... .......
நீ அன்று சிந்திய கண்ணீரில்"...
" Hello... ஹலோ...
One minute stop the song "
இது எனது' ப்ளாக்கில்' வாசித்து வரும் கொஞ்ச நஞ்ச ஆண் வாசிப்பாளர்களின் குரல்களே தான்.
'போனா போகட்டும் போடா' ... என பெருந்தன்மையோடு
நான் பகிர்வதை பெருவாரியாக வாசிப்பவர்கள் மகளிர் மட்டுமே.
நண்பர்களே கோபம் கொள்ள வேண்டாம். உண்மை பகிர்கிறேன்.
"I am sing in the rain.
I am 'ஸ்வைங்' in the...'
- இது அடியேன் தான். நண்பர்கள் மேற்கண்ட பாடலை மாற்றச் சொல்கிறார்கள்.
மாற்றுவதற்கு முன் பாடி முடித்து விடுகிறேன். பெருவாரியான மகளிருக்காக மட்டுமே.
1' St - ல இருந்து பாடுறேன்.
" துன்பம் என்றும் ஆணுக்கல்ல.
அது அன்றும் இன்றும் பெண்களுக்கே...?
.......... ........... .......
நீ அன்று சிந்திய கண்ணீரில்...
இந்த பூமியும் வானமும் நனைந்ததம்மா!
இரவென்றால் மறு நாளே விடியும்...
உன் தோட்டத்தில் அப்போது பூக்கள் மலரும்!
அன்பு கொண்டு நீ ஆடு... "
- சிப்பிக்குள் முத்து திரைப்படத்தில் இடம் பெற்ற பாடல். பாடும் நிலா 'எஸ்.பி.பி' அவர்களின் குரல் படம் முழுக்க தொடர்ந்து வரும்.
திரு. 'கமல்ஹாசன்' அவர்களுக்கு 'பாடும் நிலா' தான் குரல் கொடுத்திருப்பார். மறக்கவே முடியாத படம்.
'டவுசர்' அணிந்து திரிந்த காலத்தில் கண்ட படம். மதுரை ஜெய்ஹிந்துபுரத்து 'முருகன்' தியேட்டரில் கூட்டம் அள்ளியது. 'முருகன் 'தியேட்டர் அப்போது' c' centre. பல நாட்கள் ஓடி வெற்றி பெற்ற படத்தை இங்கு பார்க்கலாம். அப்படிக் கண்ட படம்
'சிப்பிக்குள் முத்து'
இருக்கை கிடைக்காமல் திரைக்கு சில அடிகள் முன்பு அமர்ந்து அன்னார்ந்த படியே கண்ட படம்.
மெய்யாகவே அன்னார்ந்து பார்க்க வேண்டிய படம் தான். '80' களின் மத்திமம் என நினைக்கிறேன்.
'துன்பம் என்றும் ஆணுக்கல்ல' ...
அன்று பாடியது. இன்றும் பாடிக் கொண்டிருந்தால் எனது கொஞ்ச நஞ்ச ஆண் வாசிப்பாளர்களும் மொத்தமாக வெளிநடப்புச் செய்ய ஆரம்பித்துவிடுவார்கள்.
Song lyric. 'Updated' And Reloaded...
கொஞ்ச நஞ்சம் நான் பகிர்வதை வாசிக்கும் ஆண் நண்பர்களுக்காக மட்டும்.
Song Reversion
"துன்பம் இன்று...
ஆண்களுக்கு
பெண்களைப் போலவே...
கொஞ்சம் (?) உண்டு.
பெண்மை அன்று சிந்திய கண்ணீரில்...
இன்று ஆண்களின் தேசமும் கரைந்ததம்மா!..
ஆண் தேசம் மண் மீது ஆட... "
எங்கெங்கு காணினும் மாதரின்
தடங்கள் களங்கள் தோறும் அழுத்தமாகப் பதியத் தொடங்கி காலங்கள் ஆகி விட்டன. சமீபத்திய உள்ளாட்சித் தேர்தலில் களம் கண்டு வென்ற மகளிர் ஏராளம். தங்களுக்கான தேவைகளை நிறைவேற்றிக் கொள்ளுகிற இடத்திற்கு நிறைய மகளிர் வந்துவிட்டனர்.
சமீபத்தில் ஒரு குறும்பதிவு கண்ணுற்றேன். ஒர் இளம் மங்கை
காட்சி ஊடக செய்தியாளரிடம் பகிர்ந்த விஷயம் இது.
" வீட்டு வேலை பார்த்துக்கிட்டு வீட்லயே இருக்கற கணவன் கிடைச்சா சந்தோசம். நான் சம்பாதிச்சு அவர பார்த்துக்குவேன். அவுங்க தான் வேலைக்குப் போகணுமா? மாற்றமா வீட்ல இருக்கட்டும்."
மங்கை சொல்லி முடிய படம் நிற்க காட்சியின் மறு பாதியில்
வைகைப்புயல் வடிவேலு அவர்கள் 'சூடம்' 'சாம்பிராணி' காட்டி பூசை மணி அடித்து அந்த மங்கையை ஆராதிப்பது போல உள்ள படக்காட்சியுடன் முடிந்தது.
'உத்தியோகம் புருச லட்சணம்' என்பார்கள். மங்கையர் பணிக்குச் செல்லுதல் அவர்களது சுயம் சார்ந்தது. மறுப்பதற்கில்லை. ஆனால், 'நீங்க வீட்ல இருங்க நாங்க வேலைக்குப் போறோம்' என்று கிளம்பினால்
"மாமா டவுசர் கழண்டுச்சு...". பாடலுக்கு நடனம் ஆட வேண்டியதாகிவிடும்.. "ஸப்பாடி" கண்களைக் கட்டுகிறது.
Coming to the point your honour
"மங்கையே
ஒரு சிறகு நீ...
மறு சிறகு நான்...
பறக்க தடை என்ன?..
இடைவெளி குறைந்து
எல்லாம் நம் வெளியாகட்டும்!"
என் வாழ்வில் சமீபமாக நான் அறிந்த பெண் ஆளுமைகள் நிறையபேர் இருக்கிறார்கள். பெயர்களைத் தவிர்த்துப் பகிர்கிறேன். சம்பந்தப்பட்ட நபர்களும் வாசிக்கலாம்.
பகிர்ந்ததில் குறை இருப்பின் கனிவு கொள்ளுங்கள். தண்ணீரில் எழுதிய பதிவாகக் கடந்து விடுங்கள். எனது கனிவான வேண்டுகோள் இது. ஏற்பார்கள் என நம்புகிறேன்.
நம்பிக்கை தந்த ஆளுமைகளுக்கு ஆளுயர மாலைகள் தேவையில்லை. நம்பிக்கை விதைத்த ஆளுமைகளின் செயல்களை வெளிச்சத்தில் பிறர் அறிய உயர்த்திப் பிடித்தால் போதும் என நினைக்கிறேன். வெளிச்சக் கீற்றின் ஒளியில் நம்மையும் கண்டு கொள்ளலாம்.
நம்பிக்கை மாதர்கள்
இரண்டு மங்கையரை நான் அடுத்துப் பகிரவிருக்கும் பட்டியலுக்குள் இணைக்கப் போவதில்லை. காரணம் பட்டியலைத் தொடங்கி வைப்பவர்கள் அவர்கள் தான்.
முதல் மங்கை
அம்மாவைத் தவிர வேறு யாராக இருக்கமுடியும்.
வெயிலாய், மழையாய், நதியாய், பனியின் குளிராய் மனசுக்குள் நிற்பவர். இந்த நிமிடம் வரை ஒரு நிமிடத்தில் ஒரு நொடியாவது எங்கள் (அண்ணன், தம்பி) மூவரைப் பற்றி நினைக்காமல் அந்த நிமிடத்தைக் கடக்க மாட்டார்.
உங்கள் அம்மாவும் இப்படியாகத் தான் இருப்பார். சந்தேகமில்லை. அம்மாக்களின்
கடிகார உலகில் பிள்ளைகளின் நினைவுகள் தான் நொடிகளாகக் கடக்கும்.
மகளிர் தின நல் வாழ்த்துக்கள் "அம்மா" ...
அடுத்து என் வீட்டம்மாவிற்கு...
என் பெற்றோர், சகோதரர்களைப்
போலவே என் மனைவியும் எனது 'இலக்கு' குறித்து எந்தக் கேள்விகளையும் என் முன் வைப்பதில்லை. ஏன் தெரியுமா?
எனக்கு எந்த இலக்கும் இல்லை என்பது அவர்களுக்குத் தெரியும். என் மீது இவர்கள் கொண்டிருக்கும் நம்பிக்கை
'நிலத்தினும் பெரிது. வானினும் உயர்ந்தது'.
'வீட்டம்மாவிற்கு' ...
'மகளிர் தின நல் வாழ்த்துக்கள்'.
மீண்டும் ஒருமுறை அனைத்து மகளிருக்கும் வாழ்த்துக்களைத் தெரிவித்துக் கொள்கிறேன்.
வியப்பில் ஆழ்த்திய "மகளிர்"தொடரவிருக்கும் 'உலாப் பூக்கள்' பதிவினைத் தொடர்ந்து இடம் பெறுவார்கள்.
தொடர்ந்திருங்கள். தொடர்ந்திடுங்கள்...
மனம் பறவையாகும்...
பறக்கும்...
இருதய். ஆ
