ஒவ்வொரு பூக்களுக்கும் ஒரு கதை இருக்கிறது. ஒவ்வொருவர் வாழ்க்கையிலும் பூக்கள் கதைகளோடே கை கோர்க்கிறது. வாழ்க்கை பூக்களோடு தொடங்கி பூக்களோடு முடிகிறது.
பூக்கள் மனம் கற்றுக்கொள்ளும் பாடசாலை ஆகிறது.
பூக்களின் பாடசாலையில்...
பூக்களின் அரசியோடு சரிக்குச் சமமாக மல்லுக்கட்டும் கிளுகிளுப்புக்கார பூவை இவள்.
காதலுக்கு ரோசா...
களவுக்கு?
பூக்களின் சபையில் நடந்தது நம்பிக்கை வாக்கெடுப்பு. பூக்களின் அரசி முன் மொழிய அத்துணைப் பூக்களும் மேளம் கொட்டி நாதஸ்வரம் இசைத்து ஜால்ரா தட்டி
"ஆகட்டும் மகளே உன் சமத்து!"
பூக்களெல்லாம்
முன்மொழிந்தன.
கெத்துக் காட்டி இதயங்களைக் களவாடி கற்பில் உறவாடி வாசனை கூட்டி சாமத்தில்
காமத் தேர் பூட்டி வருவாள்.
மதி மயக்குவாள்.
சொக்கத் தங்கத்திற்கு
சற்றும் குறைவில்லாத சொக்கவைக்கும் தங்கம் இவள்!
"டேங் கப்பா சாமி. ஓவர் பில்டப்பா இருக்குடா"...
பூவோட சகல வரலாறும் தெரிஞ்சிருக்கும். வழக்கமா சொல்ற மாதிரி பூவோட பேர சொல்லிப் புடு. முடியல. 'ஸப்பாடி'...
பூக்களின் பாடசாலையில்…
உலா வரும் பூ…
'தாவரவியல்' அறிதல் படி
பூவின் பெயர்…
" ஜாஸ்மினம் கிரிபித்தியை"
ஆகட்டுஞ் சாமி.
சங்கம் வைத்து வளர்த்த தமிழில் இப் பூவையின் பெயர்…
மணக்கும் "மல்லிகை"...
மல்லிகையின் கதைக்குள் பயணிக்க ஆரம்பித்தால் மயக்கமும்,
கி(ளு)றுகி(ளு)றுப்பும் மனம் இளைப்பாறும் சாவடிகளாகும்.
பயணத்தின் காட்சி1
காட்சி முழுவதும் கற்பனையே. கற்பனையில் நிசம் உண்டு
புதிதாகத் திருமணம் முடித்த
மன்மதன் ஒருவன் மாலை வேளை வேலை முடிந்து வீடு திரும்புகையில்…
சாலையோரத்து பூக்கடை
"சார்… சம்சாரத்துக்குப் பூ வாங்கிட்டுப் போங்க சார். வாங்க. 'குண்டு மல்லி' அம்சமா இருக்கு."
மன்மதனின் கால்கள் 'காம்பஸ் கவராயமாக' அரைவட்டமிட்டு' பூக்காரக்கா' கடைக்குத் திரும்ப…
பூக்காரக்கா மன்மதனிடம் பேசியபடி
குண்டு மல்லிச் சரம் பிரித்து காணாமலே கைகளால் அளவெடுத்து பச்சிலைக்குள் வைத்து முடியிட்டு மன்மதனின் கைகள் சேர்ப்பார்.
" கீழே விழுந்தாலும் மீசையில் மண் ஒட்டவில்லை கதை மாதிரி" …
மன்மதன் பூக்காரக்காவிடம்
"யக்கா… சாமி போட்டோக்களுக்கும் வேணும். சேர்த்துக் குடுங்க" என்று சமாளிப்பு சைக்கிள் ஓட்ட…
பூக்காரக்கா பார்க்காத மன்மதன்களா! எத்தனை மன்மதன்களுக்கு பூ அளந்து கொடுத்திருப்பார்.
" சார். நீங்க ஒண்ணு. சாமிக்குத் தனி. சம்சாரத்துக்குத் தனி.
அது
சம்சாரத்துக்கு.
" இது… சாமிக்கு"
'மாத்திறாதீங்க. கலர் நூல் கட்டு சம்சாரத்துக்கு. வெள்ள நூல் கட்டு சாமிக்கு".
மன்மதனின் இரு கைகளிலும் "குண்டு மல்லி" விரல் பிடிக்கும். தங்க விலை சொல்லுவார்' பூக்காரக்கா'. அதனாலென்ன?
" என்ன விலை அழகே"என பாடவா முடியும். பேரமே இல்லாமல் பூக்காரக்காவிடம்' சரண்டர்' ஆவார் மன்மதன்.
பிறகு நடப்பவைகள் 'குண்டு மல்லி' அறிவாள். புதுத் தம்பதியர் வாழ்வில் நிகழும் சிருங்கார நாடகம் இது. அகம் நாடும் கதையும் இது.
காட்சி 2
பாடல் "கம்போஸிங்" அறை
இயக்குநர் இசைமேதையிடம் பாடலுக்கான 'சூழலை' கதைக்கிறார்…
உடன் பாடலாசிரியரும் இருக்கிறார்.
"கதா நாயகி புதுசா சமைஞ்சவ.சமைஞ்சு நாட்கள் சென்டு மொத மொறையா வாசற்படி தாண்டி கையில கொடத்தோடு ஆத்துக்குப் போறா. யாருமே இல்ல. ஒரு ஆண் குரல் மட்டும் கேட்குது. சமைஞ்சவ பயப்பட்றா. ஏதேதோ ஒளறி பின்னுக்கப் பார்த்துக்கிட்டே நடக்க சட்டுனு ஒரு பள்ளத்துக்குள்ள விழுந்துட்டா. "
இங்க 'silent'
சின்ன 'கேப்' .
அப்புறம் அன்னார்ந்து பார்க்குறா! மரத்து மேல நம்ம கதாநாயகன் சிரிச்சிக்கிட்டே பள்ளத்துக்குள்ள இருக்க மாமன் பொண்ணுக்கு கயித்த விடறான். புதுசா சமைஞ்சவ குமைஞ்சு குமைஞ்சு வெட்கத்தோட கயித்தப் புடிக்க…
நம்ம கதா கயித்த மேல மேல மேல தூக்கித் தூக்கி அவள கெரக்கத்தோடயே பார்த்துச் சிரிக்கிறான்.
"Now the Romantic situation will open. Song started."
"பொத்தி வச்ச மல்லிக மொட்டு…
பூத்திருக்கு வெட்கத்த விட்டு…
பேசிப் பேசி ராசியானதே… ஏ… ஹே..
மாமன் பேரச் சொல்லிச் சொல்லி ஆளானதே!
ரொம்ப நாள் ஆனதே!...
ம்.. கூம்…"
கவிஞர் யோசிக்கும் முன்னமே பேனாவின் முனை வழி கீழிறங்கி தாள் தொடுவாள் மல்லிகை.
பாடலாசிரியர்களின் 'கைப் பாவை' என்றும் இம் மல்லிகைப் பூவை. எவ்வளவு பாடல்கள். அத்தனையிலும் காதல், களவு, கற்பு என முப்புள்ளியிட்டு ஆய்த எழுத்தாக மனசுக்குள் போர் நடத்தும்.மல்லிகைப் போரில் வென்றவர், தோற்றவர் என யாரும் இல்லை. போர் முடிந்தால் தானே வெற்றி, தோல்வி விளங்கும்.
'மல்லிகைப் போர்'
இடைநில்லா பேருந்து போல தொடர்ந்து கொண்டே இருக்கும். இலக்கு அடைந்தாலும் புறப்பட்ட இடத்திற்கே மீண்டும் திரும்பும்.
"செத்துச் செத்து வெளையாடுவமா?"
என்ற 'வைகைப் புயல்' வடிவேலு அவர்களின் காமெடிக் காட்சி போல 'மல்லிகைப் போர்' நிகழ்ந்தேறும்.
"ஜாதி மல்லிப் பூச்சரமே சங்கத் தமிழ் பாச்சரமே!
ஆசையின்னா ஆசையடி! அவ்வளவு ஆசையடி…"
'அழகன்' திரைப்படப் பாடல்
காதுகளுக்குள் ஒலிக்கிறது.
" மல்லி… மல்லி…
செண்டு மல்லி ஆள அசத்துதடி!"
மல்லிகைப் பாடல்கள் திரைகளெங்கும் விரிந்து படர்ந்திருக்கிறது.
காட்சி - 3
சமயம் வாய்க்கும் போதெல்லாம் தாய் வீடு திரும்பும் 'மணமுடித்த மங்கையரைப் போல' என் 'மனப் பறவை' சில விஷயங்களை
அசைபோடுகையில் சிறகடித்து '80' -களின் மத்திமத்தில் கால் ஊன்றி விடுகிறது.
அன்று…
ஜெய்ஹிந்துபுரத்தில் குடியிருந்த வீட்டிற்கு எதிரில் ஒரு கல்யாண மண்டபம் இருந்தது.
"கே. எஸ். எஸ். கல்யாண மஹால்"
அந்தி சாய்ந்து சாமக்காரன் கைகளில் கொடியோடு தயாராக நிற்கும் நேரம்.
கல்யாண மகாலில் வண்ண வண்ண குட்டிக்குட்டி தொடர் 'பல்புகள்' கண்சிமிட்டிச் சிரிக்க மகால் நுழைவிற்கு அருகில் பெரிய சட்டகத்தில் கண்ணைக் கவரும் தொடர் பல்புகள் நின்று அமர்ந்து நடனம் ஆடிக் கொண்டிருக்கும்.
"பொன் மகள் வந்தாள். பொருள் கோடி தந்தாள்.
பூ மேடை வாசல் பொங்கும் தேனாக…!"
நடிகர் திலகம் 'சிவாஜி கணேசன்' பாடல் காதுகளைக் குடையும்.
காதுகளைக் குடைந்து கொண்டே வீதி நோக்க வெண் குதிரை ஒய்யாரமாக நடந்து வரும்.
குதிரையில் சுக்கிரனாட்டம் ஒரு மன்மதன் முகம் தெரியாதபடி மல்லிகைப் பூச் சரங்கொண்டு மறைத்து தோள்கள் சாய்த்து சாய்த்து கண்கவர்' ஜிகு ஜிகு தக தக"' ஆடை உடுத்தி வீதி வருவார்.
கேட்ட மாத்திரம் ஆட்டம் போட கால்கள் எத்தனிக்கும்." ஆரவார பேண்டு" இசையுடன் வாத்தியக் குழு முன்னெடுத்து நடந்துவர "நிக்காஹ்" ஊர்வல "பெட்ரோமாக்ஸ்" ஒளிகளின் மஞ்சள் வண்ண கசிவுகளினூடே வெண் குதிரை மீதமர்ந்த மல்லிகைப் பூக்களால் முகம் மறைத்த சுக்கிரன் அருகாமை வர வர சாமக்காரன் கொடியசைப்பான்.
இரவு கவிந்து காற்றோடு மயக்கும்' மதுரை மல்லிகைச் சரங்களின்' கிறக்கவாசனை நாசிகளில் ஏறும்.
"மல்லிகை என் மன்னன் மயங்கும் பொன்னான மலரல்லவா!"
பாடல் காதுகளைக் குடையும்.
மல்லிகையை நினைத்த மாத்திரம் ஏதேனும் ஒரு மல்லிகைப் பாடல் உங்கள் காதுகளைக் குடையலாம். மல்லியின் மயக்கும் வாசனை நாசிகளுக்குள் குடை விரிக்கலாம். விரிக்கட்டும்.
மயக்கும் 'மல்லிகை' உலா
'உலாப் பூக்களின்' அடுத்த பதிவிலும் தொடரும். மல்லிகைச் சரம் விலகும்.
விலகாமல் தொடர்ந்திடுங்கள்…
மனப்பறவை மனம்கொத்தும்!
பறக்கும்…
இருதய். ஆ
